政情：中大激辯女神像選址

女神像依家仍然坐落喺大學火車站廣場，沈祖堯尋日同學生會商討永久擺放位置嗰陣，首次提出原來校方另有規劃，希望喺二○一二年之前，喺火車站廣場建設一個訪客中心及環保展覽場地等，預計人流會好多，所以唔太適宜擺放女神像喇。

學生會梗係唔滿意啦，會長黎恩灝堅持就算起訪客中心，同女神像都無衝突，可以並存，黎恩灝仲話之前都無聽校方講過話要喺廣場建訪客中心，唔明點解依家先講有其他規劃，不過沈校長就話仲有得商量。黎恩灝話雙方依家仲未有共識，所以仲要開會傾，如果最後仲有極大分歧，校方先會諗係咪投票決定，而學生會諗住搞公開論壇，邀請沈校長出席，但係沈校長就無即席答應出席嘞。