政情：卓永興龜縮賤招趕客
前食物環境衞生署署長卓永興出晒名同員工關係惡劣，經常成為箭靶，諷刺嘅係佢偏偏被調去專責處理勞資糾紛嘅勞工處做處長。尋日係佢調職後首日返工，即時遇上工會請願贈興，期間請願行動疑被勞工處「拉閘封升降機」阻撓，卓永興再成箭靶，被轟「將勞工處變成官僚部門」，歧視工會。唉，新官上任三把火呢招，今時今日係行唔通㗎喇。睇嚟卓永興呢塊箭靶無論去到邊，都難逃受靶嘅命運！
卓永興尋日朝早八點半左右就返到勞工處位於上環海港政府大樓嘅辦事處，比準時返工時間早咗半個鐘。佢仲發表咗幾句好官腔嘅開場白，話勞工處係實務同有意義嘅部門，未來工作好重要，包括最低工資同標準工時立法；又話促進勞工福利同保障工人權益，要靠勞、資同政府三方合作，承諾會做好喎。不過，當記者問佢有冇幫助改善勞資關係嘅良策，佢就即時轉身走夾唔抖。
卓永興返到辦公室位都未坐暖，港九工團聯合總會一行七人就到場請願，佢哋想同新上任嘅卓永興打個招呼，要求政府全面檢討勞工法例嘅訴求。不過，請願人士一到地下大堂就已經畀數名保安阻撓進入大廈，話請願區喺大廈外面，唔准上勞工處喎。
被轟官僚歧視工會
不過，工會嚟得請願自然唔係善男信女，兩三個閃身已成功突圍撇甩保安，仲入埋
，但保安亦唔蠢，即時鎖應變，期間轉咗兩部都畀保安鎖晒，雙方有少少火藥味。請願人士提出質疑話，以往都可以上勞工處遞交請願信，點解今次唔得，即場炮轟卓永興歧視工會同拒收請願信，將勞工處變成官僚部門！擾攘咗一輪，保安最後終於放行，請願人士就直殺上勞工處，並誠邀卓永興出嚟接收請願信；不過卓永興繼續龜縮，只係派代表收信，話處長開緊會唔得閒接信喎。
其實初嚟甫到，同啲工會疏通好關係先係上上之策，見個面收封信打個招呼有幾難？不過喺處理同員工關係上臭名遠播嘅卓永興，偏偏採取下策擺官威，上任唔夠一個鐘頭就辣着啲火頭，遲早有日引火自焚呀！