中環耳目：陳錦泉引入芋香瑞士卷
香港人無零食不歡，但又貪新忘舊，難怪做入口零食生意起家嘅賓仕洋行董事陳錦泉（Andrew），成日要周圍飛發掘新嘢。最近佢喺高雄發現一間老餅家製造嘅芋頭瑞士卷蛋糕，啖啖綿滑芋泥令佢一試鍾情，早前急不及待引入本港，仲親自落舖巡視新產品嘅銷售情況添。
台灣美食 中西合璧
早前銅鑼灣崇光熱賣台灣美食，卓妮都去睇吓，發掘好嘢食，咁啱見到Andrew喺度坐鎮。琳琅滿目嘅美食之中，佢推介罕見嘅芋香瑞士卷。佢話瑞士卷口味多數係朱古力、忌廉等，有次佢喺高雄發現呢個創意無限嘅瑞士卷，香濃綿滑嘅芋泥勁好味，又充滿中西合璧嘅趣味。
Andrew後來搵多名同事齊試味，又將原本偏甜口味調校至啱香港人嘅甜度，再以低溫方式空運來港。Andrew話，佢哋入口嘅食品種類過千，但港人貪新鮮，所以每年平均要淘汰約兩成舊產品，再補充啲新嘢入口，近年就因應潮流重點引入台式食品，難怪台灣零食通街都係！
卓妮