政情：政黨唔賣帳 申亞凍過水

Tim霍：人生有幾多個十年

霍震霆尋日透過電台節目發公開信畀喺廣州亞運創出三金一銅歷史佳績嘅單車運動員黃金寶，力數香港申亞嘅種種好處，又指當年香港協辦奧運馬術賽同主辦東亞運動會，輿論起初都係批評居多，但正式開賽後就即時轉向，暗示依家反對申亞嘅民意遲早會轉為支持。佢仲引用柴九哥嘅名句「人生有幾多個十年」，強調香港應好好把握呢個千載難逢嘅機會。

許曉暉朝早亦不約而同接受電台訪問，聲言政府就申亞開支進行「割價傾銷」後，民意支持度明顯提升，有愈來愈多人理解申亞理念，相信政黨會顧及整體市民反應，再決定是否支持撥款。佢咁講，擺明係借民意向掌握申亞撥款生殺大權嘅民建聯施壓。

不過據了解，政府「大減價」及港隊喺廣州亞運屢創佳績後，支持申亞嘅民意的確有所回升，但升極都只有兩成幾；而反對申亞嘅市民雖然略有下降，但仍然達五成幾。除非真係出現非常突破性嘅發展，否則佢哋九成九九都會企硬反對。

政黨要選舉唔敢逆民意而行，絕對可以理解，連冇選舉壓力嘅傳統建制社團都唔肯撐政府，就比較少見。由新任全國政協委員王惠貞任理事長嘅九龍社團聯會，尋日發表題為《藉亞運成績，推動香港體育發展》嘅聲明，最初以為又係啲瞓身力撐申亞嘅官樣文章，睇真啲先發現，文章完全冇提及支持申亞，反而強調「推動體育政策，並非單靠申辦大型運動比賽時才實行，就算不申辦，亦應盡快興建及完善各項體育設施」，即係已經對申亞問題打定輸數，同民建聯主席譚耀宗一樣，幾乎係大盆冷水潑向霍震霆同許曉暉身上。