金融界有唔少父子兵，立法會金融服務界議員詹培忠囝囝詹劍崙（Ricky）都係繼承爸爸衣鉢，從事金融業。前日金銀業貿易場舉行百周年晚宴暨理監事就職禮，嘉賓話題都離不開為後市把吓脈，金勞詹兩父子都嚟妙論股市。詹Sir坐定粒六，話恒指跌穿二萬三嘅話，大家千祈咪心慌慌，呢個正係入貨良機。佢仲大膽預測，恒指有機會跌到二萬二千點都未定。
身為金銀業貿易場候補理監事嘅公子Ricky好buy爸爸嘅眼光，話靜待恒指回落時趁機撈底，但現階段未係加碼時候。Ricky仲話：「係人都知個市會升到明年，趁低吸納實無錯。」但Ricky嘅目光比爸爸更遠大，笑言投資股票只係蠅頭小利，話與其買股票不如印股票，嚟緊將尋找更多投資項目，將公司上市賺大錢仲發喎。Ricky野心不小，果然係虎父無犬子。