政情：屯門村選發叔地頭添變數
村代表選舉提名期已展開逾一星期，好多鄉紳陸續報名競逐連任。村代表選舉網頁候選人名單最新資料顯示，行政會議成員兼鄉議局主席劉皇發盤據逾五十年嘅屯門龍鼓灘村代表選情出現變數。迄今為止，已有兩個劉姓原居民報名參選，但無一個係劉皇發，意味着一旦發叔參選，就要落場砌過爭櫈仔，顯示發叔有意放棄競逐村代表及屯門鄉事委員會主席嘅消息，並非空穴來風。
我哋早前報道受漏報買樓及「摸貨」圖利消息困擾嘅發叔，有意放棄競逐連任龍鼓灘村代表及執掌四十年嘅屯門鄉委會主席，消息擊起千重浪，令整個鄉郊以至政界都好意外，大家都猜度發叔棄選嘅背後用意，你一言我一語，同前日深圳后海灣地震、嚇到村民跑出空地議論紛紛無分別。不過，發叔連日來卻三緘其口，傳聞話一班鄉紳正極力挽留佢。
已報名競逐龍鼓灘村原居民代表嘅人士係劉東海及劉國明，職業均報稱係「商人」。龍鼓灘村現有兩個原居民代表及一個居民代表名額；如果本月廿六日提名期截止前，原居民代表方面再冇人參選，上述兩名劉姓原居民將會自動當選。
不過，近年好多原居民踴躍參與村務，面對原居民代表席位不足，部分原居民會轉循居民代表途徑參選，咁啱直到呢一刻，龍鼓灘居民代表仲未有人報名參選，亦有傳聞話發叔仲可以循呢方面參選。不過，根據政府規定，居民代表不得處理任何有關原居民合法傳統權益嘅事務，只能就所屬鄉村事務反映意見；如果發叔堂堂原居民走去選居民代表，唔知大家又會點睇呢？
「何仙姑後人」逐鹿良田村
村代表候選人名單上仲發現，自稱係何仙姑後人、喺○八年立法會選舉中競逐法律界議席嘅現任律師會副會長何君堯，都喺上周二報名競逐屯門良田村原居民代表，代替即將任滿嘅原居民代表胞兄何君柱出戰。何君堯尋晚對我哋話，自己係良田村一分子，又覺得鄉村工作適合自己，所以決定參選。至於係咪有意競逐屯門鄉委會正、副主席職位，佢就話做到村代表至有得講，一切順其自然喎！