中環出更：劉展灝蒲曼聯餐廳撐老友

男廁設計 方便球迷

曼聯餐廳位於尖沙咀樂道三十二號，今年五月開業，食正南非世界盃熱潮，但對Stanley而言，最開心係多咗個聚腳點。卓妮當晚去到餐廳，已見到Stanley三父子同朋友傾到雞啄唔斷，原來嗰位神秘老友，就係經濟動力立法會議員梁君彥（Andrew）胞弟、新興織造廠董事總經理梁嘉彥（Lawrence），樣貌同Andrew成個餅印。

Stanley一見到卓妮，第一件事唔係介紹餐廳嘅曼聯特色布置，而係好興奮咁帶卓妮去男廁參觀。卓妮堂堂女兒身入男廁？點知成班男士起哄，卓妮盛情難卻儘管去睇吓有乜特別。嘩！原來成排尿兜嘅正前方，裝咗部四十六吋高清大電視，用意係方便球迷去小解都唔會錯過精彩入球。餐廳設計咁貼心，皆因Tony同擔任餐廳董事總經理嘅囝囝劉心暉都係曼聯超級擁躉。

曼聯餐廳唔止滲透曼聯球隊特色，還提供多款歐陸菜式，餐廳行政總廚Philip更遠赴歐洲學藝，好多顧客食過翻尋味。Stanley最念念不忘嘅，係「香烤原隻意大利乳豬」，精選重二點二公斤、四星期大嘅意大利豬，以八角、香草、胡椒及橄欖油等材料浸過夜，再用慢火燒近兩小時，工夫考究絕不欺場。Lawrence就鍾意黑松露火箭菜Pizza。

Tony就重點推介最好賣嘅「七重天雞槌」，七隻雞槌分別以藍芝士醬、沙爹等七種唔同汁料配製，咬落香脆多汁，口感一流。卓妮趁散場前靜靜哋問Stanley同Tony認識咗幾耐？Tony好風趣話，同Stanley係「異父異母」兄弟，事關兩人相識廿幾年，又係工總活躍分子，兄弟真情流露。散場時，Stanley直接喺餐廳特設戶口扣數，一睇就知係熟客。

Gary（右）同Ronald兩兄弟大讚曼聯餐廳嘅菜式好味道。	曼聯餐廳乃以曼聯球隊為噱頭嘅主題餐廳，餐廳周圍都見到曼聯影子。	黑松露火箭菜Pizza
香烤意大利乳豬	七重天雞槌

卓妮