政情：陳裕光自嘲冇政治智慧

大家樂扣飯鐘事件搞到滿城風雨，令大家樂四十二年來建立嘅形象插水，身兼臨時最低工資委員會成員嘅集團主席陳裕光急急救火，上個禮拜五即刻聘請外援公關顧問公司密謀對策，翌日隨即發放新聞稿宣布撤回扣飯鐘安排。陳裕光尋日同傳媒會面時就話，事件出發點唔係剋扣同剝削，自己晚晚瞓得着，但礙於輿論壓力需要撤回方案，不過就承認今次事件處理手法欠缺政治智慧，對企業係當頭棒喝，深深感受到政治係乜嘢一回事。