上屆○七年港運會，搵咗同為奧運金牌得主嘅前體操王子李寧及「風之后」李麗珊燃點聖火，令港運會有啲睇頭，所以今屆點都要搵啲重量級體育精英助陣。周厚澄話，初步諗過幾個人選，劉翔係目標人物；如果劉翔肯拔刀相助，不但加深港人對港運會印象，更可吸引更多年輕人參賽。
今屆港運會嘅體育項目將增至八項，新增排球及五人足球兩項熱門活動，而且每區財政資助會加碼至四十四萬元，吸引力大增。周厚澄仲賣花讚花香，話港運會舉辦以來參賽者人數上升至今屆嘅三千人，青少年參與體育活動人數不斷增加，學校參加率更高達九成，達至普及體育目標。當然劉翔嚟唔嚟，就要睇特區政府請唔請得郁佢。