政情：周永成以黃金論投資
演藝學院尋日舉行榮譽博士暨院士頒獎禮，周生生集團總經理周永成獲頒榮譽院士，太太及甚少露面嘅囡囡周嘉穎（Genevieve）都嚟撐場。Genevieve為專業珠寶家，現任周生生生產運作高級主任，周老闆有乖女幫手打理生意，真係飲得杯落。
獲演藝頒榮譽院士
周永成近月名利雙收，獲頒榮譽院士外，旗下周生生集團股價都好似搭咗直升機，由八月底近十四元低位開始，一直升到尋日收市嘅廿二元兩角五仙，短短兩個多月升五成九。周老闆話，周生生股價跟隨大市先至水漲船高，又話周生生並非升得最高嘅股份喎。其實周老闆又唔使咁謙嘅，事關集團有實力先至受惠大市。
雖然股價係咁升，周老闆對金市和股市睇得好審慎，坦言投資黃金無利息，只靠金價升幅獲利，黃金亦無數據參考，好似佢事前都未諗過今年金價咁升法，所以寄語市民要分散投資，除咗買黃金，仲要喺其他方面投資。講到股市，佢就話好難估，總之大家投資要穩健，量力而為，小心駛得萬年船。
周老闆係前演藝學院校董會成員，贊助好多藝術項目，佢本身都愛好話劇及音樂表演，嚟緊二、三月又到藝術節，佢初步買咗十場節目門券，有排唔得閒。