政情：陳維安又一山人跟大師禪修
香港人生活節奏急促，少有機會停低反思。國際著名佛學大師一行禪師應港大佛學研究中心邀請，來港主持「覺醒生活營」，帶領逾千名來自世界各地嘅參加者遠離煩囂，禪修五日。參加者要朝五晚九咁進行靜坐、行禪同聽道等活動，連高官名人都卸下日常重擔，換上便服，跟禪師回歸自然。
著名本土藝術家又一山人早於○七年已被一行禪師嘅講道感動，今次更自動請纓為體驗營設計宣傳品。五日禪修營過後，又一山人最深刻係同近三百名參加者跟一行禪師行禪，再好似紅番部族咁圍住禪師坐喺草地飲茶。佢話嗰個情景對都市人嚟講確係匪夷所思，但人生本該如此，感謝禪師帶佢哋回歸原始。
有份參與體驗營嘅，仲有近排畀殺校同小班教學等教育政策搞到一頭煙嘅教育局副局長陳維安（Kenneth）。Kenneth早幾年已喺河內參加過由一行禪師主持嘅生活營，非常欣賞禪師主張嘅正念生活學，認同人應該放低內心嘅「牛」，即係放低執着，活在當下，正面面對人生。佢仲話會將禪修得着應用喺工作上，仲好希望將正念帶到立法會，同議員開會可以祥和啲。