政情：名人觀賞《上河圖》各有感受
電子動態版《清明上河圖》香港展覽尋日喺亞洲國際博覽館開幕，唔少城中名人都去捧場，好似全國人大常委范徐麗泰、全國政協常委陳永棋、港協暨奧委會會長霍震霆，同埋立法會廠商會代表林大輝等。其實佢哋喺上海世博已經睇過㗎啦，今次喺香港再睇，個個都不約而同讚好！
尋日棋哥帶埋大女同外孫Sean一齊去，佢話今次可以睇足兩個鐘，唔少細節位睇得更清楚，連一間房裏面有人喺度捉棋都睇到﹗棋哥仲大讚中國人叻，竟然諗到將《清明上河圖》變成動畫，認真一絕！已經係第三次睇嘅大輝就帶埋老婆去睇，佢話睇完之後引起佢對《上河圖》嘅興趣，仲特別研究畫中嘅動物同植物。
Tim霍快閃睇中日大戰
單拖睇畫嘅范太就話，世博前佢喺江蘇已經睇過類似嘅動態畫，不過一見到動態版《上河圖》，感受大大不同，尋日喺香港再見就更勝一籌。至於睇咗幾分鐘就趕住去睇亞運中日足球大戰嘅Tim霍亦大讚，實行拎埋部iPhone 4出嚟影相。
同場仲有未睇過動態版《上河圖》嘅前高官葉澍堃，佢讚嘆要搵其他名畫做動態版唔係咁易，事關要有《上河圖》咁嘅規模，至有咁好嘅效果。
