政情：王惠貞上位落區大搞

九龍社團聯會早前換屆，Connie走馬上任做咗新一屆理事長。佢話聯會每次換屆後，都會安排去北京見吓官員，交流意見。佢哋今次拜訪咗港澳辦、統戰部、民政部同衞生部，向不同部門反映咗唔少香港市民關注嘅議題，好似長者返內地生活、食物安全、國民教育、內地旅行團零團費、港人內地醫療質素等等，唔少都係涉及民生議題。

好似有團員建議，將返內地生活嘅香港長者納入醫療保險範圍，又提出免除持有通行證或回鄉證嘅港人入院時交保證金嘅規定等等。佢哋又向有關部門提出要求，希望將來港區人大、政協幫港人向內地部門反映意見時，部門能落實跟進個案。仲有團員建議開放多啲城市實施來港個人遊，同時加強規管到港嘅旅行團，以免再發生零團費等問題。

據聞負責嘅官員反應正面，表示會慎重考慮呢啲建議。衞生部官員仲話，香港大學正同深圳方面合作，興建一間名為「濱海醫院」嘅港式醫院，以香港模式營運，呢個對喺內地居住嘅港人嚟講絕對係好消息。好多人都關心，九龍社團聯會今次去北京有冇傾到敏感嘅政治議題，Connie斬釘截鐵咁話「冇」，因為呢個唔係今次訪京嘅目的喎。

否認為選舉鋪路

嚟緊香港有幾個選舉，明年（一一年）有區議會選舉，後年（一二年）就有立法會選舉，地區團體嘅一舉一動都惹人注目。據了解，九龍社團聯會已經同另外八個團體組成「九龍義工團」，義工數目超過五千人，服務層面仲相當廣泛，老人、青年、新移民乜都有，本月廿一日就會舉行啟動禮。明年元旦日，聯會仲會幫手搞一個醒獅活動，安排一千一百一十一隻瑞獸參加巡遊，由廣東道行到尖東百周年紀念公園，仲打算將活動申請列入健力士世界紀錄大全添。不過Connie誓神劈願話，佢哋只係集中於地區服務，成立義工團與選舉無關喎，信唔信由你。