中環出更：啟剛睇亞運撐港隊
智道跆拳總會尋日舉行會慶暨首長就職禮，香港青聯成班兄弟拉隊撐場，大力推廣跆拳道。港協暨奧委會會長霍震霆大仔霍啟剛唔係跆拳道高手，但講起日前參加廣州亞運會火炬傳遞儀式，就話好刺激。
青聯何解同跆拳道拉上關係？原來智道嘅核心成員統統係青聯兄弟班，好似前全國青聯副主席曾智雄（William），就係智道嘅永遠榮譽會長，而現任智道會長李永康，就係青聯副主席。智道搞會慶，試問青聯兄弟又點可以唔畀面!?
傳火炬信心十足
廣州亞運如箭在弦，席間話題離不開睇亞運。啟剛既係志願者團長，仲做埋火炬手，興奮心情至今未平復。佢笑言京奧同東亞運都無緣做火炬手，今次終於一償所願。問佢事前有冇秘密練跑，啟剛自信十足話：「應該唔使喇啩，分幾鐘路程咋噃。」咁最期待睇邊項比賽？佢就話:「只要有香港人參加嘅項目，我都會去睇。」
同場嘅全國青聯副主席陳仲尼（Rock）都話準備好上廣州睇開幕，仲會親自探訪香港班志願者打氣；至於青年事務委員主席陳振彬就話組織二千人北上睇亞運。而智道首席榮譽會長胡曉明都買定飛睇開幕，心水項目係網球同單車，屆時會金睛火眼
實賽果，唔會錯過緊張時刻喎。