中環出更：QE2好麻煩 猛人齊預警
揸住內地二千億美元外匯儲備巨資嘅中投公司，尋日終於喺香港成立佢哋首個海外辦事處，本港政商名人空群而出見證歷史時刻，中聯辦副主任郭莉、財爺曾俊華、前財爺百仕通（中國）嘅梁錦松、中策集團主席馬時亨、金管局前總裁任志剛、港鐵主席錢果豐、招商局集團前董事長秦曉、滙豐控股董事鄭海泉、行會召集人梁振英及兩任特首等人齊齊現身，行會成員查史美倫、老公查懋成同囝囝亦前後腳到場，場面墟冚熱鬧！
肥亨：至緊要識落車
咁重要嘅時刻，主人家中投公司董事長樓繼偉、副總經理汪建熙梗要親自南下招呼賓客，中投國際（香港）董事長劉遵義都忙到氹氹轉。不過，一講起美國再次開動印鈔機狂印六千億美元銀紙，即係俗稱「QE2」嘅第二輪量化寬鬆政策，大家都笑唔出。身為中投國際諮詢委員會成員嘅肥亨仲告誡大家：「識上車，至緊要識落車！」肥亨話，美國狂印銀紙，自然會製造泡沫，令市場波動；大家都希望搭呢班順風車，但市場不可能永遠好景，佢寄語大家要識得落車；至於幾時要落車，就好難講喇。
啱啱退休嘅秦曉都蒲頭，以前佢係招商銀行董事長，又鍾意研究宏觀經濟形勢，卓妮梗要把握機會討教兩招。佢直言QE2好麻煩，啲熱錢四處流竄，打亂晒內地同香港壓抑樓價嘅部署。冇法啦，佢話板斧得兩個，一係加息，一係實施資金管制，但係啲熱錢多到好似洪水猛獸，唔完全閘得晒喎。
錢果豐都話QE2未見錢已先見炒風，將樓市股市嘅資產價格推高晒，未來八個月係好重要嘅觀察期，萬一再嚟個QE3就好麻煩㗎啦！
上周六卓妮喺沙田馬場見到全國政協常委陳永棋，佢講起QE2都咬牙切齒，狂數美國人印銀紙製造通脹係「好自私，好唔負責任」嘅行為。佢仲形容今日嘅經濟環境，佢咁大個人都未見過，依家熱錢氾濫，有錢人買豪宅炒賣，受害最大嘅係小市民：「遲啲大家都湧到逃生門，到時嘅境況就好難想像啦！」
卓妮