中環出更：蒙德揚煲咖喱飯懷念父親

搵劉健威囝囝煮鮑魚

David尋日同太太、家姐蒙倩兒、妹妹蒙藻兒及弟弟蒙德勳兄弟姐妹四人齊出動，出席盃賽午宴，仲請來日本嘅朋友來港參加，包括樂聲牌中國北東亞本部副本部長河野優，同場仲有港大校長徐立之、理大校長唐偉章、前立法會議員丁午壽等，大家一齊開心吓。據聞有日本朋友再嘗蒙叔嘅咖喱後，話好神奇感覺到蒙叔嘅存在，而David就話會盡力搞好公司業務，相信蒙叔在天之靈會睇到。

信興在場展出好多最新潮流產品，David就重點推介當中嘅電子高速煲，好有當年蒙叔推銷電飯煲嘅風範。佢特別請來著名食評人劉健威嘅兒子劉晉，即場利用電子高速煲炮製五十頭日本吉品鮑魚，唔使兩小時就煮好，較傳統明火快得多。David話，香港有好多「無飯」家庭，希望呢款產品令更多年輕人明白煮飯唔係太難，多啲留喺屋企煮飯。

早前David同母親楊雪姬及幾個弟妹入稟高等法院，要求信興集團最大股東歸還以信託方式代佢哋持有嘅資產。卓妮問David現時嘅情況，佢同卓妮講：「無嘢嘅，單嘢嘅焦點喺基金嗰度啫！」David似乎不欲多談，卓妮於是轉過話題，問David有否考慮做馬主，原來佢都好想一嘗做馬主嘅滋味，仲透露計劃同班朋友夾份買馬匹，依家已經抽到籤，預計二○一二年就可榮升馬主。

劉晉（左）利用電子高速煲炮製日本吉品鮑，蒙德揚見到即刻想食。（徐家浩攝）	徐立之（中）出席樂聲盃賽事，唔知馬會行政總裁應家柏（右）有冇貼士畀佢？	河野優（前排左五）頒發樂聲盃予得獎馬主代表，蒙家兄弟姊妹齊撐場。前排左六起：蒙倩兒、蒙德揚、蒙藻兒、蒙德揚太太及蒙德勳。
蒙德勳

卓妮