勞永樂醫生以其專業資格指出「癡呆症」一詞無貶意，毋須指冬瓜話葫蘆，把「癡呆症」改為「腦退化症」。改得好就話有獎，改得唔好依然鼓吹「改得妙」，那未免予人「以訛傳訛」之嘆！冀望笨蛋社會的有關「腦殘者」正視。
勞醫生一語道破「腦部退化」不知所謂，皆因「名不正，則言不順；言不順，則事不成」，那何必愈改愈妖惑，使人更摸不着頭腦。憑常識，一個人既「癡」且「呆」，則可以做出許多非理性的行為。譬如「情癡」，因失控往往便變成野獸，做出仇殺妒殺；而「呆」可以連自己係邊個都唔知，更遑論記憶，如此情況下，無論從邊個角度睇，患上「癡呆症」就係「病人」。
至於「腦部退化」則肯定不是「病人」，退化係人老必然的現象。老朽年輕時，乃田徑好手，是追風的少年，如今年紀大自然機器壞，踎低執嘢或彎腰剪腳甲都有困難，同樣追風，不過係「風濕」個「風」也。生理機能嘅退化更不必提矣！「從前一支箭，如今一把扇」，此明顯退化，老當益壯，呃人嘅！不過，此正常退化，非病也。是以「癡呆」豈可與「退化」相提並論。把「癡呆症」改成「腦退化症」，乃混淆視聽，添煩增亂。
這一改大大有違「有之必然，無之必不然」的辯證。「有之必然」講的是傳統邏輯的「充要條件」，意謂有甲必有乙；「無之必不然」是無甲就無乙，甲是有乙的必要條件，兩句話合起來就是傳統邏輯所說的「充要條件」。是以「癡呆」有種種病症的「充要條件」，一改「退化」就超錯！