政情：民主派「謀反」事敗
回歸後，民主派每次競逐立法會主席都鎩羽而歸，尋日立法會大會激辯釋放劉曉波議案時，主席可能要醫肚離席，立法會內會主席劉健儀又唔喺議事堂，於是由本身係民主黨成員嘅內會副主席李華明擔任代主席，民主派終於重奪議會主導權一粒鐘咁多。
會議由自己友主持，控制大局，建制派又大多唔在場，民主派「無王管」，理應盡情玩嘢，不過，尋日會議卻出奇地平靜，無人搞突襲，只係民主黨李永達發言時涉嫌展示「道具」，佢指一指早就放喺枱面上嘅香檳，話劉曉波獲諾貝爾獎，好值得開香檳慶祝，可惜議事規則唔准，呼籲議員一陣入前廳一齊開香檳咁話。
民主派無趁肥仔明做代主席時作反，原來係「不能」也，非「不為」也。緊接李永達發言嘅鄭家富自爆，其實佢哋真係想趁肥仔明做代主席時，快快手開咗支香檳賀吓佢㗎，只係未等到李永達發言，主席就已經返咗嚟，圖謀不逞咋。