政情：毓民「冇眼睇」倒閣
社民連內鬥風波愈炒愈烈，星期日仲會舉行特別會議就推翻內閣嘅動議投票，但創黨主席黃毓民可能就「冇眼睇」，何解？因為做完黃斑病變手術之後仲未出得院囉！
話說毓民早前驗眼時發現兩隻眼都問題多多，右眼有黃斑病變、眼角膜受損同埋少少白內障，上星期三的起心肝一次過做手術處理，本來預四、五日就可以出院，點知病情比預計嘅嚴重，最終要留院起碼十日。如果最後要延長留院，即係參加唔到特別大會，真係名副其實「冇眼睇倒閣」。
不過毓民尋日特登向醫院請假返立法會講劉曉波動議，見佢除咗將右眼包到實一實外，額頭仲損咗一撻。原來佢做完手術後一直瞓得唔好，夜晚冇嘢做惟有周圍行，點知一個唔小心個頭撞咗埋牆，搞到傷口愈嚟愈多。毓民話左眼嘅白內障仲未搞得掂，明年一月仲要再做手術。