佢仲話，商界同政府都支持員工終身學習，不過香港員工放工後其實根本冇時間進修，佢以自己做例子，話每日由朝做到晚，有時凌晨四點已經起身，一直做到深夜，聖經都睇少咗。
主持答問環節嘅香港總商會主席胡定旭全力支持煲呔曾嘅講法，仲建議喺設立標準工時前，不如先為行政長官訂立最高工時，此話一出，全場爆笑。
煲呔曾致辭時引述六、七十年代紅歌手Bob Dylan嘅名曲《The Times They Are A-Changing》，解釋時代已經轉變，呼籲商界要分擔社會責任。雖然煲呔曾係Bob Dylan時代嘅人，但係佢幾次發Dylan嘅音都發唔準，台下觀眾掩住半邊嘴笑。