政情：林D9隱瞞唐唐行蹤
政務司司長唐英年九月二日滾水淥腳咁訪京，但佢行程神秘，更一度失蹤七小時，立法會尋日向港府提出質詢冀破解唐唐失蹤之謎，不過政制及內地事務局局長林瑞麟（Ｄ９）繼續發揮佢「人肉錄音機」嘅本色，令疑團仍然未解開。
林Ｄ９尋日喺會上話，唐唐當日嘅行程，港府要公布嘅已經公布晒，冇嘢要補充，但就話一啲有例行性質，又或者仲喺磋商階段嘅會議，港府未必會公布，喺適當嘅時候先會公開交代。白鴿黨劉慧卿聽到Ｄ９咁答梗係火滾，怒斥佢呢個答案「非常混帳」。其黨友李永達更寸爆港府刻意隱瞞：「佢又唔係去揼骨按摩、唔係去食北京填鴨、唔係私下買長城紅酒，佢究竟去做乜？你話適當時候會交代，係咪兩年後公布其實中央喺當時欽點佢做特首？」
工業界議員林大輝挺身保護唐唐，問Ｄ９世界上有咩國家係明文規定高官一定要將佢外訪行程「巨細無遺」咁向大眾交代。Ｄ９即時把握機會，話英國同加拿大嘅國會都冇咁嘅規定，多謝大輝畀個機會佢澄清喎。