政情：自由黨新丁硬撼陳淑莊

○七年區議會選舉一役，山頂烽煙瀰漫，成為全港選戰焦點，結果田少「徒弟」林文傑不敵陳淑莊，自由黨失卻多年老巢。轉眼三年，明年區選逐步逼近，匯賢智庫葉劉淑儀早前曾向自由黨叩門，探路能否喺山頂區「讓路」，等佢單挑陳淑莊，最終無功而還，自由黨咁堅決請葉太食檸檬，原來因為自由黨對山頂區已定晒作戰圖，練兵三載，唔會輕言返轉頭，而明年會代田少收復失地嘅重任，就落喺一個叫陳浩濂嘅社區幹事身上。

陳浩濂年輕有為

據悉，自由黨揀中陳浩濂，並非一時心血來潮，而係經過嚴謹計算。陳浩濂上年先至加入自由黨，但其專業背景好快被高層相中，呢位擁有美國密西根大學經濟學及心理學雙學位嘅自由黨中半山社區幹事，三十三歲就晉升到投資銀行董事總經理，現為兩位年幼女兒嘅父親，事業家庭美滿，自由黨評估，喺專業及工商界雲集嘅山頂選區，呢種形象最為討好，甚至會比田少重出江湖更具吸票力。

自由黨高層做開大生意，打算盤心思細密，加上經歷○七年區議會同○八年立法會兩次直選失利，選舉思維已漸趨向務實，不再迷信「名氣」效應，今次鎖定栽培陳浩濂出戰山頂，就係其中一個例子。

自由黨高層個算盤係咁打嘅：田少雖為富豪，但同性相拒，若再戰山頂，亦未必吸到其他富家大戶「鄰居」嘅選票，反而改由年輕有為嘅專業人士出戰，同陳淑莊鬥專業、鬥年輕，勝算更大。再者，○七年區選一役，自由黨喺鬧出「周松崗風波」嘅不利情況下，林文傑仍然取得六百八十票，以一百一十六票之差落敗，反映自由黨喺山頂根基紮實，反之，公民黨今年中夥拍社民連發動「五區公投」，政治意識形態激進，或已嚇怕工商界及中產，喺形勢此消彼長下，山頂呢塊失落之地，自由黨好有信心明年可以同公文袋爭一日之長短。