中環出更：棉花公主演繹愛女設計
行政會議成員楊敏德係跨國紡織集團溢達嘅掌門人，有人幫佢取咗個「棉花公主」花名，都好襯佢喺時裝界嘅江湖地位，事關佢間公司供應至靚嘅衣料畀世界知名時裝集團，好似Tommy Hilfiger同埋Hugo Boss等。最近佢進一步瞓身支持本地設計師，前日出席行會會議時，就演繹咗囡囡潘楚穎用自家物料製造嘅衫裙，難怪佢嘅笑容充滿自信。
自掏腰包 以示支持
尋日楊敏德又翩然出現喺理工大學第十六屆畢業禮暨榮譽博士頒授儀式，佢去年十月接任理大校董會主席，係理大史上第一個女主席，果然係巾幗不讓鬚眉。佢曾經話過會支持本地創作，原來佢講得出做得到，前日就着咗件地道港產靚衫出席行政會議。
卓妮同棉花公主傾開先知，原來套衫係囡囡潘楚穎嘅設計，採用嘅絲質同棉質混紡針織衣料，都係楊敏德自家公司出產嘅靚料。佢話套衫喺北京有得賣，雖然係愛女嘅作品，但係佢自己掏錢包使咗幾百蚊喺北京買㗎！