中環出更：炳江「扑頭」 媽咪細佬快閃
理工大學尋日舉行畢業典禮暨博士學位頒授，有四位傑出人士獲頒榮譽博士學位，包括新鴻基地產副主席郭炳江（Thomas）、「玩具大王」蔡志明、專攻中國研究嘅哈佛學者柯偉林及兒童福利護理先驅馬婉麗。近日郭氏家族酌情信託基金權益爭拗鬧得火熱，Thomas、郭老太鄺肖卿及郭炳聯在場最矚目，可惜郭老太同郭炳聯避記者快閃走人。
蔡志明哈爾濱讀大學
學位頒授典禮於下午三時開始，但卓妮見Thomas喺大半個小時前已經現身，當時未有家人隨行，直到兩點半鐘，郭老太同郭炳聯就抵達現場恭賀Thomas，三人拉埋理大校長唐偉章合照後，郭老太同郭炳聯就急急腳離開。有人問Thomas點解佢啲家人唔睇埋頒授儀式就咁快走？Thomas話：「係呀，費事畀記者圍嘛！」咁太太呢？佢講笑話：「我太太經常失蹤㗎啦！」
Thomas之所以咁緊張家人，睇怕都係唔想被記者追問同胞兄郭炳湘嘅紛爭，但佢自己都特別小心。話說尋日港府拍賣九龍塘延文禮士道地皮，Thomas被記者追問賣地及樓市走勢，佢事先同記者約法三章只係回應地產問題，其他問題一概唔講，結果佢一答完地產問題就由職員陪同下進入會場。
獲頒榮譽工商管理博士嘅蔡志明就獲大班親友撐場，包括太太李惠莉、大女蔡加敏及夫婿馬鴻銘、女兒蔡加怡及細仔蔡加讚，就連大哥及大嫂、親家馬介璋都有出席。蔡老闆早已取得哈爾濱工業大學博士學位，但為何要去到咁遠讀書呢？佢話十幾年前諗住報讀清華大學，但有人建議佢報讀哈爾濱工業大學，最終用一年多時間完成課程，就算幾辛苦都值得喎！