政情：騰雞美華縮骨吹風會
早前政府部門被炮轟依家經常以「消息人士」形式放料嘅吹風會愈嚟愈濫，損害公眾知情權，當中以邱騰華做局長嘅環境局情況最嚴重，邱局長更被批評上任三年以嚟，無論係膠袋收費或停車熄匙等重要嘅民生政策，都冇正式開記者會交代。
雖然畀人鬧爆，但政府部門態度依舊，吹風會陸續有嚟，尋日新鮮熱辣又一個，就係人稱「騰雞美華」嘅民政事務總署署長陳甘美華。騰雞美華尋日喺修頓中心三十樓總署大本營開吹風會，講業主立案法團買第三者保險嘅問題，佢帶住幾個保險界人士坐喺台上解釋，仲有副署長傍住，整個過程同記者有問有答，冇乜敏感同爭議性，簡直就係一個記者會！
過往政府搞吹風會，事先講明只可引述消息人士、唔准影相，但騰雞美華呢個吹風會有啲唔同，既可以引述佢講乜嘢，亦可以影相。如果大家以為佢哋係接受批評後有所改進，咁就諗錯晒嘞！事關放鬆部分限制，仲懶公開咁，但竟然唔准錄音，究竟葫蘆裏賣乜嘢藥？莫非想講嘢唔認帳？若然係咁，就認真縮骨啦！