政情：盧文端阿松世博「罰企」
上海世博閉幕禮後曲中人散，有八個港澳全國政協委員獲上海市海外聯誼會邀請出席閉幕禮，香港有六個，包括福建幫頭領盧文端、專資會創會主席容永祺（Samuel）等，澳門則有馬萬祺大仔馬有恒。喺三十日閉幕論壇當日，八位港澳政協好似小學生咁，聽國家領導人及諾貝爾得獎者等世界級人馬講嘢，個個都乖乖地由頭坐到尾，由上午嘅大會到下午嘅分組論壇，都無人敢走堂。
容永祺返港再掃AIA
盧文端同容永祺都話，參加三十一日壓軸節目就相當開心，特別係來自唔同國家及種族嘅世博工作人員一齊載歌載舞，現場氣氛令佢哋好感動。不過，盧文端話，唯一美中不足係閉幕前嘅招待晚會，只有國家元首有份出席中國領導人設嘅晚宴，其他嘉賓就要「罰企」食自助餐，連有份喺高峰論壇上主講國際金融嘅黑石集團大中華區主席梁錦松，都要同太太伏明霞企埋一份。
盧文端話企喺度食嘢好唔自然，連佢都食唔飽，散場後同太太去王寶和大酒店嘅餐廳食蟹宴，勁擦三隻大閘蟹填肚。講開又講，身為AIA資深區域總監嘅Samuel，透過公司認購及機構投資者身份申請新股，但認購嘅嘢佢唔肯講。不過，佢廿九日下午去上海，上午剛好係AIA上市，股價升得幾好，佢心情當然好興奮，返嚟仲喺適當價位再入貨。何解咁搏殺，皆因覺得公司前景一片樂觀！