政情：一行禪師釋放港人壓力
現今國際最具宗教影響力嘅領導人物之一嘅一行禪師已旋風抵港，嚟緊由佢舉辦嘅生活營及公開講座已全數爆滿，一票難求。聞說佢主持嘅活動不乏要趁機洗滌心靈嘅名人參與，大家都想實踐禪師嘅哲學，喺日常瑣事中，體會「幸福就是此時此地」。
為港大藝術展揭幕
已屆八十四歲嘅一行禪師係越南人，早年喺法國成立梅村佛舍道場，推廣正念生活藝術，備受社會稱頌。一行禪師今次率領五百名弟子抵港，展開為期兩星期嘅活動。尋日佢到港大美術館為「墨觀禪書：一行襌師的靜觀藝術」展覽揭幕，認為書法可以反映人生哲理嘅一行禪師，每到一個國家都會用嗰個國家嘅語言題字，今次亦唔例外，分別攞咗多幅中文書法作品用作展覽。
尋日所見，追隨佢嘅弟子，包括多個種族嘅人士。
一行禪師尋日題咗一個「空」字送畀港人，希望港人能藉此學習釋放壓力，感受活在當下嘅喜悅。今次活動，係香港大學邁向一百周年慶典嘅前奏活動。