政情：金勞詹點醒鬍鬚曾
二○一二年特首跑馬仔嘅戰幔經已拉開，財政司司長曾俊華都曾經係疑似特首候選人，不過近年行情被看淡。心灰意冷嘅佢原來曾經請教高人，問自己應該何去何從。高人指點迷津話，鬍鬚曾一係就原地踏步繼續做財爺，一係就再上層樓做政務司司長（CS）。呢位高人係邊個？「潮州怒漢」詹培忠是也。
舊年年頭，鬍鬚曾仲被視為特首候選人熱門之一，點知舊年九月尾，佢因為急性心臟病而要入院做通波仔手術，此後外界開始將鬍鬚曾剔出疑似特首候選人名單。金勞詹尋日向傳媒爆料時話，大約半年前鬍鬚曾請教佢自己仕途應該點走落去，雖然金勞詹無透露鬍鬚曾當時嘅表情語氣，但聽得出鬍鬚曾已深知自己同特首寶座無緣。
續任財爺或升做CS
於是金勞詹向鬍鬚曾教路，一係繼續做財爺，一係就升呢做CS，不過CS之位大有儲君意味，將來有望坐正特首寶座，既然鬍鬚曾無乜機會做特首，仲畀佢做CS嚟做乜？至於鬍鬚曾聽完有咩反應，金勞詹就無講落去嘞。
除咗特首跑馬仔外，一二年立法會選舉係另一個戰場。金勞詹實牙實齒話，佢同立法會中總代表黃宜弘都會退下火線，是真是假大家要拭目以待。至於佢徒弟旅遊界謝偉俊會點呢？金勞詹話謝偉俊有心去直選，去邊區就未知，而下屆旅遊界個位會由邊個頂上，就要睇經濟動力同自由黨傾唔傾得掂數囉！
另外，金勞詹估計七十四歲嘅鄉議局主席劉皇發會喺立法會再坐一會。講起發叔，前排身兼行政會議成員嘅佢，因為漏報買樓利益及喺樓市摸貨圖利問題而搞到一身蟻，咁啱鄉議局副主席林偉強嘅支持者又輸咗坪洲鄉事委員會街坊代表選舉，意味林偉強出年要同坪洲鄉委會主席及離島區議會主席之位道別。金勞詹打趣話，鄉議局新大樓都未入伙，正副主席已先後出事，都係搵人睇睇風水啦！
最後講番金勞詹本行股票市場，好賭嘅佢話澳門博彩稅收仲勁過香港印花稅收，既然香港搞唔成賭，一於將港交所打造成為全亞洲最大嘅賭場，實行勁過澳門咁話。不過佢預料金融海嘯會重臨，事關金融市場喺八七、九七同○七年都遭到衝擊，十年一閏，下次可能喺二○一六至二○一八年間，真係信不信由你。