中環耳目：彭一庭推介Caprice田雞飯
俊和集團以土木及建築工程起家，對於質素嘅要求梗係滴水不漏，馬虎不得，俊和集團主席彭一庭（Dominic）對美食嘅要求一樣採取高標準。佢推介四季酒店六樓嘅法國餐廳Caprice，盛讚以佢哋米芝蓮三星級質素來講，價錢唔算貴，早前太太仲特登安排同佢喺度撐枱腳，慶祝生日，諗起都甜到漏。
Dominic話，當晚佢對餐廳嘅法式炒田雞腿意大利飯印象最深刻，覺得好好味。Dominic食嘢要求好高，其實佢好鍾意食日本菜，貪佢少油，夠晒健康。不過卓妮問佢覺得邊間日本餐廳最正，佢就諗極都講唔到餐廳名，事關佢總係覺得啲食肆未夠十全十美。
講起Caprice呢道佳餚，精彩之處係以法式煮法炮製。首先將田雞落鑊炒過，令表皮香酥、肉質甜嫩，然後佐以香草汁，待其精華全被田雞吸收，最後配上西班牙甘腿同埋意大利飯，呢道就係令Dominic回味無窮嘅美食啦。