歌手王菀之（Ivana）形象一向乖巧健康，私底下嘅佢，原來好錫家人，一有時間就陪屋企人歎茶，呢個年代仲有咁黐家人嘅乖乖女，認真難得。早前一個星期日下晝五點，卓妮喺中環歷山大廈間COVA餐廳，撞見Ivana同兩男兩女響度high tea，其中一對中年男女，睇嚟似係佢嘅父母，但Ivana只話係屋企人。
卓妮見Ivana坐低後只柯打咗一杯西瓜汁，食得好節制。梗係喇，佢呢個月尾將舉行音樂會，西瓜汁潤喉又唔肥，啱晒！
