中環出更：陳智文愛女搶購黃岩畫作
藝術係人類追求超脫品味嘅最高境界，喺藝術嘅世界，唔需要太多話語都可以心靈相通。好似前日香港藝術中心包氏畫廊舉行中國當代藝術家黃岩嘅五年作品展，唔止吸引一眾政商名流撐場，好多嘉賓仲即席開支票訂購心頭好，短短幾小時就賣出廿幾幅作品，知音者包括亞洲金融集團董事長陳有慶嘅大孫女陳曉鈴（Stephanie）。
眨吓眼，呢位陳氏家族第四代已經亭亭玉立，並且讀完番書返嚟家族企業幫手，現任亞洲金融資深副總裁。卓妮早前聽陳有慶太太讚過呢位孫女好有藝術天分，仲打算同佢一齊搞個慈善畫展，慶祝佢同陳有慶結婚六十周年。當日Stephanie好難得同爸爸陳智文一齊嚟睇畫展，兩父女都好欣賞黃岩嘅作品，仲即時落訂買咗一幅《夢．敦煌》，盛惠二萬三千元，小妮子話要掛喺屋企好好欣賞。
明年孖嫲嫲開畫展
至於陳家祖孫三代開畫展一事，成個甜姐兒咁嘅Stephanie同卓妮講，畫展預定喺明年開，依家仲準備緊啲畫作。卓妮問陳智文會唔會同囡囡一齊參展，佢雖然都識畫畫，但就好客氣咁話唔會啦！不過尋日陳智文都有意外收穫，就係發現明年畫展喺包氏畫廊舉行都唔錯。
主人家包陪麗同卓妮講，今次畫展嘅目的，係想推廣重返大自然嘅創作思潮。黃岩係國際知名嘅藝術家，佢以人體作畫布嘅創作風格，風靡中外，佢嘅作品曾創下一百萬人民幣嘅拍賣紀錄。