中環出更：式和開畫廊姊妹齊撐場
華光航業集團董事長趙世光與影星何琍琍嘅三位千金各有擅長，大家姐趙式明係做生意能手，二妹趙式和就好有藝術天分，三妹趙式平則醉心廚藝。式和最近更完成夢想，喺灣仔聖佛蘭士街八號開設GALERIE HUIT當代藝術畫廊，上周四正式開幕，趙世光率領趙家上下到場打氣，真係趙家一心，其利斷金。
卓妮都有親身去感受吓GALERIE HUIT嘅藝術氣息，見式和丈夫李承康一早到場打點，佢大讚太太對藝術好熱情，感染佢都愛上藝術。李生做製衣業生意，每次出門例必帶埋太太同行，公餘時間就陪太太一齊睇藝術品同物色畫家，今次更喺背後全力支持太太搞藝術畫廊，認真甜到漏。
式明「屈」送畫
大家姐趙式明同細妹趙式平，當日齊齊以高貴黑色套裝衫裙到場恭賀式和開設畫廊，三姊妹結伴行來行去睇畫，式明笑稱要式和送贈藝術畫，一定唔會自己掏荷包買喎！至於式平就秘密請咗畫廊嘅旅法畫家尹欣，畫幅畫送畀老公做結婚周年禮物，順便支持姐姐開舖搞生意。
GALERIE HUIT開張，打響頭炮嘅係八位優秀藝術家嘅作品展，包括尹欣、Patrick Gerola、黃愷、牛淼、陳琦、夏俊娜、胡煒及Gines Serran Pagan，各有藝術特色。好似幫式明繪畫嘅尹欣，作品融合了中國傳統與當代具像藝術於油畫中，以揭示中國過去與近數十年嘅改變，好有深度。
卓妮先前提過式明打理生意頭頭是道，原來佢仲好識照顧屋企人。當年趙家三姊妹留學在外，式明照顧兩個妹妹起居飲食，煮得一手好中菜，食到大家豎拇指，連喺法國廚藝畢業嘅式平都自愧不如。