政情：吳秋北勢成為新票王
勞工顧問委員會一向係勞工界直接同政府表達意見嘅重地，加上嚟緊要研究標準工時咁爭議性議題，好多工會都希望爭奪席位以便發聲。新一屆勞顧會選舉本月廿七日舉行，上月廿一日啱啱截止，今次總共有十一人爭五個位，其中四個係角逐連任，其餘七個候選人中，最矚目嘅莫過於工聯會理事長吳秋北。
吳秋北雖然係新丁，但佢係工聯會重點栽培對象，工聯會誓必出盡全力為佢拉票，有望打破上屆工聯會代表崔世昌以三百二十八票成為票王嘅紀錄。而四個角逐連任嘅委員包括勞聯副主席吳慧儀、工團秘書長李德明、公務員總工會主席鍾國星同公務員工會聯合會主席梁籌庭。由於四人已有經驗，連任機會亦較高。
至於其餘六個候選人當中，康樂事務職員總工會主席張兆榮已是第二次參選，另外五人則屬首次參選，包括執達主任助理協會財務主任程伯年、救生員總工會秘書施家羨、健體專業人員總會理事長王曉山、中大職員協會會長郭慧良及城巴僱員協會會長凌志偉。