政情：錢大康未返工先出汗
從科技大學過檔到香港大學做首席副校長嘅錢大康，啱啱履任兩個月，依家住喺港大沙灣徑宿舍嘅錢副校長，仲將踩單車嘅習慣由科大帶埋去港大，每日晨早六點都會落街踩單車，由宿舍踩去摩星嶺再折返，踩到滿頭大汗先至返工，唔怪得依家身形咁fit啦！
雖然錢副校長會戴埋安全帽、全副武裝踩單車，係威係勢，不過佢就謙稱自己唔係單車高手，仲話曾經幾次仆親添：「一條平路中間突然有阻礙物，就最考起我，好彩無大礙。」
原來錢大康嘅生活時序都能人所不能，雖然每日都瞓六至八個鐘頭，但就採用「斬件式」睡眠法，晨咁早踩單車後，至夜晚差不多九點鐘就會自動瞓着，但深夜兩、三點又會中途起身，回覆工作上嘅電郵，然後又瞓過，真係相當唔得閒。
錢大康上任以來工作繁忙，但佢話覺得港大學生思想靈活，而且非常多國際學生，印象好好，佢遲啲就要參觀埋課堂，睇吓大家學習情況喎。