政情：梁美芬幫工程界爭飯碗
西九新動力主席梁美芬為壯大區議會同立法會選舉實力，早前拉攏工程界加入自己陣營，幫區民免費提供同屋宇工程有關嘅專業諮詢服務。梁美芬尋日再出招，不過今次輪到佢幫工程界，公布對西九文化區嘅一系列建議，要求呢個二百一十六億元嘅世紀工程，設計部分需要確保本地建築師可分一杯羹，擺到明幫番工程界爭飯碗。
助中小型建築師行
西九新動力同工程界社促會尋日宣布「共建西九宣言」，拋出一整套打造西九文化區建議，好似改善維港水質、用交通連接帶旺周邊地區，以及設立「少數民族藝術館」咁。得西九，得天下，對九龍西議員嚟講，一定要喺西九議題發聲，今次梁美芬仲順手拉埋工程界嘅票，話會求見政府主事官員，要求西九估計約十億元嘅設計費用，確保本港中小型建築師行都有機會中標。
梁美芬係專業會議成員，同僚之一正係工程界議員何鍾泰，今次梁美芬喺「西九宣言」加入工程界權益元素，幫本地建築師出頭，可以話曲線幫何鍾泰鞏固業界票源。