政情：喬老爺南下做補習天王
二○一二年行政長官同立法會選舉嘅政改本地立法建議已公布。正當爭論方案嘅聲音開始逐漸響起嚟之際，過往多次喺香港政改問題上扮演重要角色嘅全國人大常委會副秘書長喬曉陽，下星期三南下深圳，同港區全國人大代表碰頭，官方公布指要同大家講解中共中央十七屆五中全會精神同「十二五」規劃，不過，香港政界關注，喬老爺向港區人大「講書」期間，會唔會觸及香港政改問題呢？
港區人大收到通知，今個月九日（周二）同十日（周三）到深圳上學習班，就最近十七屆五中全會同「十二五」規劃補課，緊貼國情，最特別係，講明喬老爺會專登南下，擔任補課老師一職。消息一出，引起政界揣測，往年每年三月人大、政協「兩會」前夕，港區人大、政協先至會獲安排到深圳開預備會，但好似下星期咁中間加插一堂國情雞精班，過往少見，而且勞動到喬老爺「授課」，反映中央頗為重視今次安排，當中唔知有乜玄機？
眾所周知，喬老爺係中央負責睇住香港政改嘅要員，每次政改行到關鍵路口，喬老爺都會現身，為大家解惑釋疑。○七年中央否決二○一二「雙普選」一役，喬老爺南下香港，以座談會形式舌戰民主派，令人印象深刻。到今年六月立法會通過政改方案，港區人大到南京考察，中央就安排特別節目，派喬老爺專程飛去南京，為人大舉辦政改座談會，解釋中央最終決定接納民主黨區議會方案嘅原委，以安撫建制派質疑中央扶持民主黨嘅情緒。下星期喬老爺南下深圳晤港區人大，難免惹人遐想，令人揣測會否代中央傳遞有關政改嘅重要訊息？
王光亞南下深圳召見唐唐
有港區人大表示，喬老爺南下授課，安排喺港府公布政改本地立法建議後嘅一個星期進行，時間過於巧合；加上立法建議仍有若干問題懸而未解，好似民主派要求一次過就普選時間表立法，親中陣營到底應該取態如何，一直未獲指示。今次喬老爺南下，會唔會順便收風，聽取意見，甚至係代中央「宣旨」，向港區人大面授機宜一番，大家拭目以待。
講開京官南下同政改，消息指，港澳辦主任王光亞十月八日上任後不久，曾南下深圳處理香港政改事務。不過，並非報道所指見香港地區組織，而係會晤政務司司長唐英年同政制及內地事務局局長林瑞麟，聽佢哋講解即將公布嘅政改本地立法建議內容。