中環耳目：肥平曾智明推廣客家文化
香港閒閒哋有二百萬客家人，但客家文化一直被忽略。身為客家人嘅金利來行政總裁曾智明（Ricky），尋日帶頭舉行全港首個客家文化節，喺沙田曾大屋筵開六圍，請傳媒朋友及鄉里大擦客家菜。
客家名菜多，Ricky預備咗客家鹽焗雞、黃酒雞及梅菜香芋扣肉等畀大家品嘗。大飽口福後，前民政事務局長何志平以半個客家人身份帶大家尋根。肥平話自己算係半個客家人，但佢只係醉心研究客家文化。佢話廣義嚟講，全港七百多萬港人都係客家人噃，係唔係真㗎？
肥平研究過，客家人並非指某一個特定社群，但凡客居於香港嘅港人，都係客家人，大家應該認識同珍惜客家文化。客家文化節嚟緊將有連串活動，包括客家歷史展覽、客家歌舞表演，最搞鬼莫過於一場「客家美食之炆豬肉大賽」，香港六家食肆將於林村較勁，爭奪炆豬肉大王寶座。Ricky原來靜雞雞以香港嘉應商會名義，捐出三十萬元，聯同其他客屬團體，齊齊贊助客家文化節。
