中環出更：林健鋒靚呔保佑贏錢
男人西裝總逃不出暗沉嘅灰藍黑，於是領呔就係男人追求變化嘅花花世界，個人品味亦都喺呢個寸土之上表露無遺。前日卓妮喺快活谷馬場見到經濟動力立法會議員林健鋒（Jeffrey），佢戴咗條滿布行李篋同雀鳥嘅粉紅色Hermes靚呔，顯得愉快輕鬆。Jeffrey笑言，啲行李篋係用嚟贏馬之後袋銀紙走㗎！
當日Jeffrey出席工總慶祝五十周年嘅盃賽盛事，佢手氣唔錯，但只係小注怡情，所以雖然場場有錢收，但都未至於要出動拖篋咁誇張。Jeffrey話，條呔係太太幫佢買嘅，佢間中都會自己買一、兩條，不過基本上都係由太太話晒事。
咁即係佢好欣賞太太眼光？又唔係喎。實情係Jeffrey好講究喺唔同場合配搭唔同領呔，佢牙擦擦咁話：「好似有時同老婆喺街拖手仔，都要同老婆嘅衣着襯吓色嘛！」所以佢咩顏色嘅領呔都有。
已經有一百七十幾年歷史嘅Hermes，係法國知名品牌，除咗名媛必備嘅靚袋之外，仲有男女裝服裝、香水、手錶、帽等，甚受追求品味生活一族嘅歡迎。