高官告訴年輕大學生：結婚不一定要買樓，租樓一樣可以「幸福的生活」。年輕人急於置業，除了「冇樓女友唔肯嫁」，更大原因是樓價失序係咁飆，待儲得一筆首期，可惜樓價又三級跳，置業興家又泡湯。
高官個個有貴價物業揸手，叫年輕人不必急於買樓，梗係早已為自己啲仔女妥善打點好，「官二代」何患冇靚屋住？呢啲就叫「站着說話不腰疼」。現實是如今租樓都唔易，皆因好多業主見勢好紛紛攞嚟賣，即使租開亦不再續租，情願收番善價而沽，試問啲租盤買少見少豈能不加價？
鬍鬚曾吹噓香港經濟今年強勁增長，有信心全年增長如何如何。之不過蟻民可享受到增長成果嗎？最低工資未見其利先見其害，呢頭話加時薪，嗰頭又話唔計食飯時間，一加一減實則仲衰過唔加，呢個世界太涼薄。
鬍鬚曾承認整體樓價自○八年底以來已累升四成七，情況實屬少見令人憂慮。解決的辦法係所謂「制訂適當、適度及適時」的措施。鬍鬚曾又係模糊大師，長遠房屋政策就冇，隨口噏兩句，當正就可「留有餘不盡之巧，以還造化」。鬍鬚曾，「花繁柳密處撥得開，方見手段；風狂雨驟時立得定，才是腳跟」，虧你仲話自己少習詠春，說話如此華而不實，老朽有啲懷疑你都係未得其神髓！
香港年輕人急於置業買房子的原因，那就是高房價，而且在政府一路叫「冇樓唔代表冇幸福」下一路攀升，任何理想與期望都替代不了現實的教育作用。先租後買的「置安心」一如風中之燭，高官們，畀啲實用啲嘅手段好嗎？