癌病復發婦求兩萬藥費
「一路食住藥同覆診，情況都好穩定，點知突然又復發，真係好擔心！」罹患甲狀腺癌的李倩雯曾因無力支付自費療程而一度絕望，○八年在東方日報慈善基金協助下，獲善長捐助逾三萬一千元以開展療程。可惜當病情漸有起色之際，最近又驚悉癌病復發，現正為籌措兩萬多元針藥費而大感徬徨，期望善長可再次施以援手。
受甲狀腺癌復發影響的阿雯已切除癌細胞，但仍須接受放射治療，消滅仍可能存在於頸部或已擴散至身體其他部位的癌細胞，接受有關治療前必須連續注射兩針自費針藥，「醫生仲話半年後要再做多一次，到時又要再打多兩針，夾埋要二萬幾蚊，叫我去邊度搵錢打？」
四十四歲的阿雯與丈夫早年離異，多年來一直與兒子阿康相依為命。本身患有精神病的阿雯同時患有哮喘、痛風症及心臟病等多種疾病致無法工作，母子二人須靠綜援過活。
兒子剛出身 望離綜援網
幸而現年二十二歲的阿康剛於今年六月畢業，近日更在便利店覓得店務員一職，月薪六千餘元，與母親遂改為申領低收入綜援，並以脫離綜援網為目標。
「個仔啱啱出身，諗住兩仔乸慢慢可以自食其力，唔再靠綜援，點知依家個病又復發！」阿雯正為兒子找到工作而欣慰之際，未料再因舊病復發而擔心成為兒子包袱。阿康亦對母親病情憂心忡忡，「好擔心阿媽嘅病，屋企經濟環境唔好，兩年前好彩有《東方日報》嘅善長幫手，依家我仲未有能力負擔起阿媽嘅醫療費，希望再有善長幫手！」
瑪麗醫院發言人證實，醫生建議病人接受放射性碘治療，治療前一般需停服甲狀腺素，但因病人身體狀況不宜停藥，醫生建議接受放射性碘治療前先注射Thyrogen，每劑針藥費用五千二百五十二元。
捐款編號：11578
記者 徐少琴