政情：姪孫叫陳瑞球「死伯公」
今年施政報告聲稱要協助自閉症兒童，但等到施政落實真係蚊都瞓，好彩尋日有間專為自閉症兒童而設嘅鄰舍輔導會陳蔭川學兒樂園開幕，由陳蔭川慈善捐款紀念基金捐出一百五十萬元贊助設計及裝修。已故陳蔭川係紡織界老行尊長江製衣主席陳瑞球嘅胞弟，球伯同姪女陳淑蘭（陳蔭川女兒）尋日就以基金信託人身份，一齊為學兒樂園揭幕。
球伯尋日仲帶埋姪孫（陳蔭川嘅外孫）撐場。佢話姪孫以前都係自閉症兒童，姪孫尊稱佢做「四伯公」，每逢拜年見面都會叫聲佢，但礙於姪孫細細個講嘢口齒唔伶俐，經常叫咗佢做「死伯公」，但姪孫都有長處，就係睇地圖好叻。球伯又話，陳蔭川早於八○年離世，遺願係希望幫助有需要嘅人，所以佢就同姪女透過基金捐錢，支持自閉症兒童。
球伯透露自己原名叫陳瑞鉸，但「鉸」字好多人唔識讀，後來改為「球」字，而佢胞弟陳蔭川都有另一個名叫陳瑞鴻。好似球伯呢啲民間力量都積極為自閉症兒童出力，勞工及福利局局長張建宗都賣口乖，盛讚學兒樂園係切合施政報告嘅及時雨喎。