政情：白韞六幫盧振雄頂更
入境處處長白韞六竟然變咗消防處處長盧振雄？非也，只係臨時頂更啫。話說第三屆「健康快車慈善跑步為光明2010」尋日喺清水灣鄉村俱樂部舉行，嘉賓星光熠熠，除咗公安部原常務副部長田期玉同保安局局長李少光外，警務處、入境處、消防處、海關等多個紀律部隊首長都有參加。
不過，當頒獎禮上準備頒發慈善跑優異獎嗰陣，司儀邀請頒獎嘉賓消防處一哥盧振雄上台，點知眾人左望右望未見其人，於是司儀惟有「臨時拉伕」，請下一個頒獎嘉賓、入境處處長白韞六臨時頂上。
其實一眾紀律部隊一哥齊齊參加四公里慈善步行，聽落都有睇頭，但大會安排就有啲古怪，起步禮上晝九點舉行，但招待傳媒嘅專車就九點半先喺坑口出發，睇唔到幾位本港保安阿頭浩浩蕩蕩起步嘅英姿，認真可惜。
健康快車專為內地貧困地區有需要人士，提供免費白內障手術，創會主席方黃吉雯話佢哋喺中港兩地都有基金，北京嘅基金會有公安部退休部長，中港兩地紀律部隊交流密切，「個個係老朋友」，順便敍吓舊。