政情：阿松倡增供應遏樓價
國際小母牛香港分會尋日喺維園舉行每年一度嘅競步善行，主席梁錦松同太太伏明霞帶埋七歲半嘅大女Amy及近六歲嘅二仔Edward到場湊熱鬧，同場仲有籌委會主席葉澍堃（Stephen）、「快勞夾大王」杜振源（Simon）及奧運體操金牌得主李小鵬夫婦。談到樓價愈炒愈高，阿松、Stephen同Simon都覺得樓價太貴，建議增加樓宇供應遏抑炒風。
葉澍堃自嘲買唔起
阿松貴為前財爺兼黑石集團大中華區主席，必定掌握經濟脈搏。問佢股市同樓市係咪已出現泡沫，阿松就話股市暫時未見異樣，但樓價的確好貴，認為可從供求着手，增加供應自然炒唔起。Simon就話目前樓價好似拍賣紅酒咁貴得瘋狂，批評港府穩定樓價措施唔夠硬淨。Stephen就笑笑口話：「樓價梗係貴啦，有錢買就唔貴，好似我咁買不起就貴囉！」
今年「十人十一足」競步行籌得逾七百萬元，連同早前嘅籌款晚宴，共籌得逾一千萬元善款，用於幫助內地貧困農民自力更生。尋日見阿松攞住部Leica相機幫老婆仔女影相，原來佢學生年代已學攝影，仲話以前啲相機大大部，後來愈出愈細，依家又興番玩大機（單鏡反光機），所以佢都有部大機看門口，但尋日人太多，唔方便帶大機喎。