政情：周永新叫關愛基金收檔
關愛基金可算係今年施政報告嘅「惹火尤物」，絕對係繼政府嘅房屋政策後，畀人炮轟得最激烈嘅措施。雖然基金出台後，先後獲得城中巨富揼心口捐出數以億計款項，但查實商界對關愛基金嘅取態依然迥異。恒隆集團主席陳啟宗早前就狠批基金儼如向商界徵稅，信和系主席黃志祥日前亦公開表明未決定會否捐助基金。言猶在耳，港大社會工作及社會行政學系講座教授周永新尋日亦加入戰團，力數基金四大弊端，更矢言硬推基金行唔通，只會成為怪物，建議政府索性打消成立基金嘅想法！
做過扶貧委員會成員嘅周永新，尋日喺電台節目中公然同政府打對台，批評基金漏洞處處。第一，佢批評基金成立目的同作用不明，唔清楚政府咁做係承認現有社會保障制度不足，定係想商界捐多啲錢。第二，受助對象不清晰，政府連要去幫助咩人都模糊不清。周永新老實不客氣話，過去政府向立法會申請幾億元撥款，都要將撥款目的同受惠人列得清清楚楚，但今次呢個涉及百億元嘅基金，就乜嘢細節都唔清唔楚，相信難以得到立會認同。
曾德成揸旗 田少唔放心
第三，佢認為基金最大嘅弊端，係背後欠缺一個完整理念，成立之前冇諗過點樣將基金同現有嘅社會制度配合，令基金容易淪為有錢人對窮人嘅施捨。第四，商界同政府混埋一齊，「事情不好辦」，所以索性建議政府快啲將成立關愛基金呢個諗法摺埋，自己攞五十億出嚟扶貧算喇，同商界各有各做。
同周永新一樣做過扶貧委員會嘅自由黨前主席田北俊，早前已經狠狠地踩過關愛基金一腳，尋日佢上電台時，又附和周永新嘅睇法，認為取消關愛基金呢個諗法「可以考慮」。田少仲話，慈善呢家嘢，理應係畀勞工及福利局搞先係，家吓判咗畀曾德成掌舵下嘅民政事務局搞，容易惹起政治敏感：「民政局要處理區議會事宜，會唔會到時建制派政黨申請撥款時就批，其他政黨就唔批㗎？」田少言下之意，唔知係咪信唔過德成局長，擔心自由黨屆時申請撥款時，輸蝕畀民建聯同工聯會？