中環出更：KK四喜臨門聖誕抱孫
全國政協委員、廣東社團總會主席王國強（KK）最近行運一條龍，旗下金陶軒酒家月初勇奪旅發局《美食之最大賞》兩個至高榮譽金獎，下月十二日又獲浸會大學頒授榮譽社會科學博士，年底更榮升做爺爺。咁都未夠喎，KK擔任會長嘅香港專業人士協會，主席簡松年剛獲增補為全國政協委員，會長同主席兩個全國政協拍住上。
位於佐敦柯士甸道童軍中心八樓嘅金陶軒，近年生意蒸蒸日上，月初勇奪旅發局兩項榮譽金獎，生意更加好。卓妮日前約埋好友去試得獎名菜，點知又遇到KK喺度突擊試菜，監察菜式嘅水準。金陶軒奪獎，KK固然開心，但佢第一時間報喜嘅，係大仔紹基嘅太太預產期喺聖誕節，到時佢就會升格做爺爺，四代同堂樂也融融，真係飲得杯落。
卓妮一場來到，當然要試吓奪至高榮譽金獎嘅菜式啦，包括海鮮組「紫袍羅漢會龍皇」及雞組「脆皮椰子雞」。金陶軒總經理謝德橋（Stanley）話，今次佢哋組成十人團隊出戰，除咗精心鑽研菜式外，仲要計算成本限制，事關海鮮組及雞組成本上限分別為四百元及二百元，不能超標，加上佢哋嘅「糖醋子薑骨」及「麗影紅紗卷」之前都有獲獎，所以今年壓力大增。
推介得獎名菜宴
據聞「紫袍羅漢會龍皇」喺參賽時用嘅係大大隻花竹蝦，皆因上碟比較好睇，但KK就覺得，食嘢貴精不貴多，太大隻蝦容易飽肚，所以建議改用較細隻嘅海中蝦，等食客可以品嘗更多美食，果然夠細心。唔講唔知，KK嘅廚藝都好高，煲仔飯係佢拿手好戲之一，但佢話製作過程相當辛苦，要由生米不停攪動至熟，火候先至夠均勻，佢啲仔女自細食到舔舔脷。
KK當日仲親身改良自家嘅「黃鱔田雞飯」，原本黃鱔切片鋪喺煲仔飯上，但KK覺得唔夠入味，要求將黃鱔切絲，同田雞一齊混入飯中，令煲仔飯有更香嘅黃鱔味，KK對菜式咁講究，睇嚟大廚都無得偷懶。金陶軒目前已有四大鎮店獲獎名菜，為咗老饕們一次過試齊四味菜，最近就特別推出「得獎名菜宴」，加埋老火湯「准杞螺頭龍骨燉海中寶」、清蒸老虎斑及KK炒米等，有興趣一試嘅朋友，當然要先預訂啦。
紫袍羅漢會龍皇
材料：大隻花竹蝦及矮瓜
製法：花竹蝦釀入矮瓜落鑊炸，配上日式芝麻醬及自製醬汁，另有炸至金黃色嘅越南紙糯米盞做點綴。
脆皮椰子雞
材料：肉嫩骨軟嘅龍崗雞
製法：糅合火雞烹調法，以針筒注射法將椰汁注入雞件內，醃製廿四小時後用椰汁浸熟，吊乾後再將雞件炸至金黃色。
卓妮