立法會政府帳目委員會七位成員一向都分別由四位建制、三位泛民嘅比例組成，不過呢個機制原來喺其中兩名成員，即係社民連黃毓民同公民黨梁家傑年初辭職玩「公投」之後已經出現變數。坊間一直盛傳有建制派議員想阻止黃、梁兩個入番帳委會，最新消息係，旅遊界議員謝偉俊（Paul）對帳委會席位虎視眈眈，擺明要做攔路虎阻住黃毓民入番帳委會。
黃毓民同梁家傑嘅帳委會席位依家由另外兩位泛民議員頂更，兩位替工原本打算喺今日內務委員會會議上辭職，之後將帳委會席位過番畀黃、梁兩個，可惜依家殺出攔路虎，消息指阿Paul會出嚟爭，今日內務委員會肯定有嘢睇。
事件主角謝偉俊尋日冇正面回應選唔選帳委會，不過佢話，自從黃、梁兩個辭職之後，協調機制已經破壞咗，但係佢自己工作已經好繁重，依家未考慮爭唔爭帳委會個位喎。留晒後路畀自己，阿Paul意圖相當明顯，之前五區補選時佢老婆白韻琹吵到大大鑊，今次唔通係代妻狙擊黃毓民？