中環耳目：柯大俠愛喜悅人情味果腹
人稱「柯大俠」嘅中策集團行政總裁柯清輝，去年退休前係恒生銀行副董事長，大班風範深入民心，早前卓妮喺電子業商會嘅酒會度見大俠翩然來到，人氣依然不減。同佢傾開食經，大俠話對食物唔係咁在意，只要有相熟嘅老友招呼、傾吓偈，勝過歎山珍海味。
一魚兩食 燉湯滋陰
咁大俠最鍾意去邊間食肆搵老友呢？原來喺上環、中環同埋炮台山都有分店嘅中式食府喜悅飲食集團，係佢嘅私人飯堂。佢同集團董事長歐滿堂好熟，班夥計又好好招呼，難怪佢對喜悅不離不棄，唔介意做佢哋嘅生招牌。
歐老闆話畀卓妮聽，柯大俠對燉湯嘅要求好高，次次都會預先着廚師準備條靚魚，例如黃皮老虎斑，然後一魚兩食。通常魚嘅頭骨會與天麻、川芎同埋白芷等藥材齊燉五小時，滋陰又鮮美。燉湯係喜悅嘅拿手好戲，難怪大俠食到讚不絕口。至於魚肉就用來炮製翡翠炒球。歐老闆話，除此之外，大俠對其他嘢就冇咩特別要求喇！
