政情：伍得良宴賀雙喜臨門
餐飲聯業協會創會會長伍得良為慶祝七十大壽，早前喺九龍灣國際展貿中心間「煌府」筵開八十圍，順便慶祝結婚十三周年。良哥近年患上初期柏金遜症，但無礙佢享受人生，晚宴上更着晒禮服，坐上花車進場，十足新婚咁high。
良哥喺餐飲界人面廣，唔少飲食集團老闆紛紛到賀，包括新光酒樓常務董事總經理胡珠、稻香集團主席鍾偉平、餐飲聯業協會會長黃家和，仲有立法會飲食界代表張宇人等，主人家以鮑魚、燕窩款客，排場十足。
「人生七十古來稀」，唔知良哥有咩生日願望？佢笑騎騎話，最想推動中國同香港嘅飲紅酒文化，事關唔少中國人習慣將紅酒左溝右溝，喺老外眼中，呢種飲食文化認真失禮。良哥話中國經濟起飛，生活品味都要提升，稍後會同啲品酒會合作開班教大家品嘗紅酒。
問良哥送乜結婚周年禮物畀太太，佢公開示愛話：「我送個心畀佢（太太）。」伍太都唔執輸，即場回敬一個飛吻畀老公，真係恩愛！