政情：過街老鼠卓永興被叮走
政府尋日突然宣布由財經事務及庫務局副秘書長（庫務）梁卓文下月六日接替卓永興擔任食物環境衞生署署長，新聞稿只係提到梁卓文嘅資歷同公職，卓永興嘅去向就一句都無提到，令人覺得今次調動好離奇，卓永興去向成謎。其實卓永興領導下嘅食環署一片混亂，問題一大堆，依家先叮走，算遲喇！
卓永興做得好唔好，大家都有眼睇，過往三年佢統領嘅食環署管理混亂，數極都數唔完，例如食環署職員經常被人踢爆蛇王、街市空置率又長期高企，浪費公帑。佢做署長，連老鼠都惡過人周街咬遊客，破壞晒香港嘅國際形象。擦鞋匠、雪糕仔都畀佢欺壓到冇啖好食，控煙執法一鑊泡，加上滅蚊又不力，搞到傳染病到處散播。總之係瓣瓣都唔掂，數極都數唔晒，卓永興早就應該被叮走，冇得留低。
好嘞，卓永興終於要調離食環署，奇就奇在政府唔交代佢調去邊喎，公務員事務局就話佢會先放假，下一個職位將會分開公布。消息就話佢唔係離開政府，只不過係調職，可能冇乜部門有興趣收留佢，費事佢帶埋啲散漫嘅風氣同低能嘅作風周圍去。而政府有人事調動，但唔公布被調走嘅人下一個崗位呢個做法非常罕有，睇怕要搵份工畀佢，公務員事務局都有排張羅，佢今次嘅長假，一定係有排放。
梁卓文接任
至於接任署長一職嘅梁卓文今年四十四歲，年紀好輕，佢八七年七月加入政務職系，做過前政務總署、前布政司辦公室、前教育統籌局等，○三年至○七年出任工業貿易署副署長，其後就任職庫務局。佢最近一次現身係五月港鐵股東大會，有位婆婆喺會上忽然大鬧政府身為港鐵大股東，但負責運輸嘅鄭汝樺同負責財務嘅陳家強就唔見咗人，現場身為政府代表嘅梁卓文就即刻企起身，為政府拆彈，令阿婆順番條氣。
公務員事務局局長俞宗怡尋日力讚梁卓文有出色嘅領導及管理才能，但就半句都冇提卓永興過去嘅表現，咁嘅舉動，已經講明一切喇。