中環耳目：麻辣水煮魚俘虜周太心
四川名菜水煮魚係唔少老饕嘅至愛，食得辣嘅人都應試吓呢道惹味佳餚。已故社交名人周啟邦嘅獨子周國豐（Brandon）太太黃泳霖（Jenny），至愛中環花園道科達中心嘅三希樓招牌菜水煮魚，事關佢最鍾意食麻辣嘢，直頭好似上晒癮。
Brandon同埋Jenny係社交場合常客，早前卓妮同佢哋傾開食嘢，原來兩人都好鍾意食濃味嘢，好似blue cheese咁。Jenny話自己特別鍾意濃味嘅感覺，尤其是對三希樓嘅水煮魚，更是念念不忘。
三希樓馬經理同卓妮講，水煮魚係佢哋嘅招牌菜，連外國人都聞香而來。佢哋有幾種生猛活魚供客人選擇，好似東星斑、桂花魚同龍躉咁，東星斑食落鮮甜，桂花魚就滑身啲，各有特色。至於成煲醒胃嘅辣椒都唔簡單，落齊子彈椒、貴州椒、雲南椒同埋花椒，香、麻、辣味俱全，上碟時香味撲鼻，令人食指大動。
